أسامة نبيه
تحدث الإعلامي أحمد شوبير عبر إذاعة «أون سبورت إف إم» عن الجدل الذي أُثير مؤخرًا حول تصريحات المدرب أسامة نبيه، مؤكدًا أن ظهوره الإعلامي الأخير لم يكن موفقًا، سواء من حيث التوقيت أو التحضير.
وقال شوبير: “الحقيقة شوفت شوية ردود فعل على السوشيال ميديا وشوفت ردود أسامة نبيه، وباختصار هو ماكانش موفق. أصلًا ظهوره كان غلط، لأن الأمور دي بتحتاج راحة وترتيب، تاخد نفسك وتبقى عارف هتقول إيه ومتوقع الأسئلة اللي هتجيلك”.
وأضاف: “أنا لما ببقى ضيف في برنامج، ببقى عارف نوعية البرنامج وشكله عامل إزاي، لأن قبل كده اتخبطت في برنامج أو اتنين مكنتش مهتم بيهم أوي، ومكنتش موفق. طول عمري بحضر لشخصية المذيع أو المذيعة”.
وتابع شوبير حديثه موضحًا: “دلوقتي على اليوتيوب، بجيب حلقات وأشوف مذيعين نيتهم صافية ومذيعين طبيعتهم حراقة، ومذيعين بيحبوا يوقعوك في الكلام. فطبيعي لازم تكون دارس اللي هيحاورك ومتوقع الأسئلة. اللي شوفته إن أسامة نبيه المرة دي ماكانش موفق خالص”.
وجاءت تصريحات شوبير في سياق تحليله لأداء الشخصيات الرياضية في الإعلام، مؤكدًا أن الظهور العفوي دون استعداد كافٍ قد يضع الضيف في مواقف غير محسوبة أمام الجمهور.
