أبدى لامين يامال، نجم منتخب إسبانيا، حماسه لمواجهة المغرب المحتملة في نصف نهائي كأس العالم 2026، مؤكدًا أن المراحل النهائية من البطولة تمنحه حماسًا أكبر.
ويواجه منتخب إسبانيا نظيره بلجيكا في الدور ربع النهائي، بينما يلتقي منتخب المغرب مع فرنسا، في الدور ذاته من بطولة كأس العالم المقامة في أمريكا وكندا والمكسيك.
وقال يامال في تصريحات لصحيفة «موندو ديبورتيفو»:«عندنا ذكريات كويسة قدام فرنسا، لكن مواجهة المغرب هتكون حاجة استثنائية بالنسبة لي، والأهم إن المنتخبين أقوياء، بغض النظر عن المنافس، إحنا هنلعب علشان نكسب ونتأهل للنهائي.»
وأضاف:«حاسس إني أقدر أقدم مستوى أفضل، أنا دايمًا بطلب من نفسي كتير، ومش بكون راضي بسهولة عن اللي بقدمه، كنت بعيد حوالي شهرين بسبب الإصابة، والموضوع بيختلف لما تلعب 7 مباريات ورا بعض، وتشارك لدقائق طويلة، وقتها الأداء بيتحسن أكتر.»
وتابع:«في النهاية، الجماهير بتفتكر اللحظات دي، وأنا بحس بحماس أكبر بداية من دور الـ16 وربع النهائي. مشيت خطوة بخطوة بهدوء علشان أوصل للي أنا فيه دلوقتي، وأنا في حالة كويسة وجاهز أقدم أفضل ما عندي مع منتخب إسبانيا.”
وقال:«مباراة البرتغال ساعدتنا جدًا ومنحتنا ثقة كبيرة، لأننا واجهنا واحد من أفضل 3 منتخبات في كأس العالم، والخروج بالفوز عليها أعطانا دفعة قوية قبل مباراة بلجيكا.”
وأضاف:«لكننا عارفين إن مباراة بلجيكا هتكون مختلفة تمامًا، وفي كأس العالم أي حاجة ممكن تحصل.»
كما تحدث يامال عن الأرجنتيني ليونيل ميسي وما يقدمه خلال البطولة، قائلًا:«الكل عارف مين هو ميسي، لكن محدش كان متوقع المستوى الكبير اللي قدمه، وأنا سعيد علشانه. كنت سعيد كمان لنيمار وكريستيانو رونالدو، لأنهم لاعبين تركوا بصمة في طفولة كل لاعب، وبالتأكيد أتمنى نوصل للنهائي ونفوز بالكأس.»
