د.إيمان يحيى، استشاري نفسي إكلينيكي
د.إيمان يحيى
ليه بنزعل ونفرح عشان 22 واحد بيجروا ورا كورة؟ عشان تشجيع الكورة بيلمس حاجات نفسية جوانا أعمق بكتير من النتيجة.
أول سر: الانتماء
لما تشجع فريق، إنت دخلت «شلة» كبيرة أوي، التيشيرت والهتاف واللون بتاع النادي بيخليك حاسس إنك تبع مجموعة. الإحساس ده بيقلل الوحدة ويديك قوة وثقة. كأنك لقيت عيلة تانية بتفهمك من غير كلام.
تاني سر: تفريغ الشحنة
بعد يوم طويل ضغط وشغل، الماتش هو المتنفس بتاعك، التعليق على التحكيم، التنطيط مع الجول، الانشغال بالماتش آخر 5 دقايق.. كل ده بيطلع التوتر اللي جواك، مخك بينسى المشاكل ويركز في حاجة واحدة بس 90 دقيقة، وده اسمه تفريغ نفسي صحي.
تالت سر: دروس ببلاش
الكورة كلها مكسب وخسارة، مفيش فريق بيكسب دايماً، فإنت بتتعلم الصبر لما تخسر، وبتتعلم الأمل وتتعلم متتكبرش ولا تتغر لما فريقك يفوز، نفس العقلية دي هي اللي بتخليك تقوم بعد أي إخفاق في شغلك أو دراستك وتكمل بدافعية لما تحقق إنجاز.
رابع سر: اللمة الحلوة
الماتشات بتجمعنا. قعدة الصحاب، الهزار مع صاحبك اللي بيشجع الفريق المنافس، والفرحة الجماعية بعد هدف، كل دي لحظات بتقوي علاقتك بالناس وبتعمل ذكريات تفضل معاك.
بس خلي بالك
التشجيع يبقى مضر لما حياتك كلها تبقى متوقفة على ماتش. لما تزعل أوي لدرجة تنكد على نفسك بالأيام أو تأثر على صحتك وحياتك، أو لما تتعصب على اللي حواليك عشان كورة.
من الآخر، خلي الكورة متعة ليك مش عبء عليك، افصل بينك وبين النادي، هي معمولة عشان تضحك وتشحنك طاقة إيجابية، مش عشان تاخد من راحة بالك، ومبروك لمصر الدور 16 كاس العالم.
اقرأ أيضاًكواليس وداع مصر للمونديال.. ماذا قال حسام حسن وصلاح للاعبين؟
حين دخلت السياسة إلى الملعب.. كيف كسب المنتخب المصري احترام العالم رغم الخروج من المونديال؟
