محمد هاني
رامي نادي
احتفل محمد هاني، لاعب الفريق الأول لكرة القدم بالنادي الأهلي ومنتخب مصر، بوصوله إلى المباراة رقم 403 بقميص القلعة الحمراء.
وكتب محمد هاني عبر حسابه على مواقع التواصل الاجتماعي على حساب «إنستجرام»: «من وأنا صغير كان حلم من أحلامي إني أشوف لاعيبة الأهلي وأبقى واحد منهم.. روحت النادي الأهلي وأنا عندي 9 سنين، ومن ساعتها وأنا بحلم باللحظة دي».
وأضاف: «وصلت للفريق الأول وكان نفسي بس ألعب ولو ماتش واحد، والنهاردة أنا لعبت 403 ماتش وبقيت جزء من تاريخ النادي، زي ما هو تاريخي كله».
وواصل الظهير الأيمن للقلعة الحمراء: «كنت نفسي أحتفل معاكم بالإنجاز ده السنة اللي فاتت، بس النتائج وقتها ماكنتش في صالحنا، النهاردة وصلت لـ403 ماتش في مسيرتي مع الأهلي، وده كان واحد من أهدافي اللي كنت بحلم أحققها».
وكشف محمد هاني عن هدفه المقبل مع الأهلي، قائلًا: «بس الحلم مابيوقفش هنا.. الهدف الجديد إني أوصل لـ500 ماتش في البيت اللي اتربيت فيه، وأبقى أكتر لاعب في تاريخ النادي يحقق بطولات وأفضل أساعد الأهلي حتى لو بحاجة بسيطة».
ووجه محمد هاني رسالة شكر إلى جماهير الأهلي وإدارة النادي وزملائه، قائلًا: «شكرًا لجمهور الأهلي اللي كان دايمًا سند ليا وساعدني أوصل للحظة دي، وشكرًا لإدارة النادي على دعمها المستمر، وشكرًا لزمايلي.. من غيركم عمري ما كنت هأوصل للرقم ده، 403 ماتش.. ولسه الحكاية مكملة».
